El periodista Francisco Álvarez gana’l Xosefa de Xovellanos

Francisco Álvarez alzóse esti xueves col XXXVI premiu Xosefa Xovellanos cola novela “Agua d’agostu”, una revisión de la vida y la muerte del anarquista José Bonaventura Durruti.

La novela “Agua d’agostu” albídrase como “una crónica lliteraria y periodística de fondu históricu” sigún afita’l so autor na qu’una periodista fai de filo conductor: “una crónica periodística de los años 20 nos que, como sabe, utilizábase un llinguaxe bien distintu al d’agora”.

El xuráu del premiu más nomáu de les lletres asturianes valoró la trama y desenllaz narrativu, amás de la cadarma, qu’inducen a la llectura continua de la obra, xuntu col manexu de fontes d’información y documentación que-yos abulta apurren verosimilitud abonda a la hestoria narrada.

Francisco Álvarez González (Xixón, 1970) foi periodista del diariu asturianu ‘El Comercio’ por más de venti años, pasando per delles estayes hasta llegar a deportes. Entamó na emisora llibre Onda Latina de Madrid y col periódicu oficial de la Selmana Negra de Xixón. Cursó estudios na Facultá de Ciencies de la Información de la Universidá Complutense de Madrid. Esti llibru ye’l caberu del autor, tres ‘Patiu de prisión’ (VTP, 1998), ‘En poques pallabres’ (Trabe, 1998) y ‘Dixebra: cróniques d’un pueblu’ (L’Aguañaz, 2003), o “Historia de cinco goles: el mundial de Guaje” (La Cruz de Grau, 2010).
Ye tamién lletrista de Dixebra y col ‘Cantar de la redención’, foi escoyíu Meyor Cantar n’Asturianu nos Premios de la Música 2010, en Madrid. Anguaño desenvuelve tamién trabayos como traductor d’italianu.