El novelista Fulgencio Argüelles asoleya un conxuntu de relatos illustraos, cola soledá como exe central

Formatu de luxu pa una incursión navidiega del novelista Fulgencio Argüelles na narración n’asturianu. L’Academia de la Llingua asoleya una edición de mil exemplares en gran formatu y papel satinao a collor de la obra ‘Seronda’, un conxuntu de tres relatos illustraos pol debuxante xixonés Jorge Enrique Maojo qu’ayeri se presentó formalmente en Xixón cola soledá como exe conductor de les narraciones qu’integren el llibru.

La obra d’Argüelles, ganador como autor en castellán de los prestixosos premios de novela ‘Azorín’ y ‘Café Gijón’, sal a la cai a un preciu de venta de 24 euros y fuera de colección dala de l’Academia poles sos singulares característiques, yá que trátase d’una edición d’alta calidá que la entidá asoleya a propuesta’l propiu Argüelles pa espardir y dignificar l’usu de la llingua asturiana como idioma de creación y llectura.

A lo llargo de tres relatos -‘La seronda de les cases invisibles’, ‘El sele marmullar d’un vigulín’ ya ‘Inxamás nun fai sol’-, Fulgencio Argüelles constrúi un mundu particular pobláu por personaxes siempres vulnerables pola soledá, espuestos a escenarios que bancien ente lo real y lo imaxinario.

Afincáu na llocalidá de Cenera depués de pasar dellos años en Madrid, onde cursó estudios de sicoloxía, Fulgencio Argüelles algamó nel añu 2000 el premiu ‘Principado de Asturias’ cola novela ‘Recuerdos de algún vivir’, y recibió estremaes distinciones polos sos relatos en llingua asturiana en certames lliterarios de L.lena, Cabrales y Sograndiu.