El nomamientu de los conseyeros de la tv autonómica abre-y la puerta a la elección del director del ente

Hai conseyu, yá pue haber director. El Parlamentu autonómicu aprobó ayeri la composición del conseyu d’alministración de la radiotelevisión pública asturiana, que pasa de proyectu a realidá depués d’un abegosu procesu de creación y qu’antes de fin d’añu, según les pretensiones del Gobiernu, tendrá un director xeneral. El PP quedó finalmente fuera del órganu decisoriu de la tv por voluntá propia y pedirá la comparecencia de los conseyeros.

L’Executivu autonómicu mantién nun secretismu estremu el nome del futuru responsable de la radiotelevisión pública, que tará al frente d’un conseyu ‘amenorgáu’ de nueve miembros nomaos por PSOE ya Izquierda Xunida-Bloque por Asturies: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz.

Na sesión d’ayeri na Xunta Xeneral asoleyáronse los argumentos yá vieyos d’un y d’otru bandu políticu. El PP censuró’l coste, al so xuiciu descomanáu, que tendrá l’ente de comunicación y mantién que’l proyectu nun ye prioritariu, argumentos que niega’l PSOE. Pol so llau, Izquierda Xunida-Bloque por Asturies insistió na so propuesta de que’l director de la tv seya nomáu pol Parlamentu, y non pol Gobiernu autonómicu.

Depués d’un llargu camín d’engarradielles ente partíos políticos -y tamién nel sen de la propia Federación Socialista Asturiana-, nel que llegaron a intervenir los sucesivos Gobiernos centrales del PP y el PSOE, la radiotelevisión autonómica asturiana empezará emitir en prebes a mediaos de 2005 dende dependencies remocicaes de la Universidá Llaboral de Xixón.