El músicu astur-americanu Michael Lee Wolfe participa nun conciertu de Radio 3

Michael Lee Wolfe presenta estos díes el so discu ‘Corners of the world’ en Madrid. Ente les comparecencies en distintos medios de radio y televisión, el músicu americanu graba esti miércoles una actuación en directu dientro los Conciertos de Radio 3 que se va emitir prósimamente na 2 de TVE. Coincidiendo cola promoción del so discu na capital del estáu, el guitarrista afincáu n’Asturies tien a puntu de rematar un nuevu trabayu nel que continúa el so apueste polos soníos contundentes del bluegrass.

La presentación en Madrid de ‘Corners of the world’ pasaos dalgunos meses después de la so edición pol sellu asturianu Ámbitu ye pa Lee Wolfe: “una de les coses estrañes que nos suelen suceder a los músicos independientes de vez en cuando”. El guitarrista americanu asiste con desenfadáu distanciamientu a esta minixira promocional qu’inclúi la grabación el miércoles 9 d’un directu nos Conciertos de Radio 3: “supongo que nos dará a conocer…un pocoñín más a la xente que sigue la música que facemos, dalgo que pa los folkies ye mui americano, pa los siguidores del bluegrass demasiao folkie y pa nós lo que nos presta tocar pa divertinos”.

Michael Lee Wolfe va tar acompañáu nes actuaciones madrilanes polos sos avezaos compañeros de viaxe nos sos trabayos de bluegrass: Ángel Ruiz al banxu y Dani Casielles al contrabaxu. El guitarrista trabaya anguaño en dar los últimos remates a un nuevu discu del qu’adelantró a Asturnews que va titulase: “Asturies Bluegrass Sessions” y del que dixo “ye otru viaxe d’esta aventura na que tamos por divertinos y tocar un tipu de música nel que nos afayamos a gustu porque permite bien de posibilidaes d’improvisar y tocar de manera llibre”.