El Muséu Xovellanos recuerda’l legáu del arquiteutu Díaz y Negrete nel so centenariu

Coincidiendo col Día Internacional de l’Arquitectura, y cerrando l’añu nel que se celebra’l centenariu de la nacencia de Miguel Díaz y Negrete, el Muséu Xovellanos inauguró una esposición que destaca’l valor de l’arquitectura contemporanea asturiana y de los sos autores, a partir de los materiales calteníos nel arquivu profesional del arquiteutu.

L’actu inaugural cuntó cola presencia de Miguel Barreru, director de la FMCE y UP; Lucía Peláez, directora del Muséu; Ana Díaz-Negrete, fía del arquiteutu y Héctor Blanco, comisariu de la esposición. La selección de documentos ye una amuesa representativa del so conteníu al empar que dexa apreciar la trayectoria creativa d’esti arquiteutu mientres más de mediu sieglu.

Mientres seis décades, Díaz y Negrete intervieno en casi 4.000 proyectos fechaos ente 1947 y 2010. Esa llarga y granible vida profesional xeneró un arquivu constituyíu por otros tantos espedientes que güei ocupen abargana de 35 metros llineales d’estanteríes. Esti fondu documental foi xeneráu pola mesma actividá del so estudiu d’arquitectura, y convirtióse col pasu del tiempu nun interesante legáu tantu dende’l puntu de vista técnicu como históricu y artísticu.

A lo llargo d’esa trayectoria realizó obres de promoción o participación municipal  que tresformaron la fisonomía de la ciudá: la construcción del Estadiu El Molinón (1951), la reforma del paséu del muriu de San Llorienzo (1954)  el grupu de viviendes municipales de l’avenida Constitución (1955) el Grupu de les 1.500 viviendes de Pumarín (1956-1960), finxu a nivel nacional no referente a la solución de grandes grupos de vivienda de promoción pública, respondiendo a criterios tantu d’economía como calidable, el Pabellón de deportes de L’Arena (1966), la rehabilitación de La Escalerona (2002), proyectu que regaló al  Conceyu.

La esposición, que va permanecer abierta hasta’l día 31 de xineru, inclúi un programa d’actividaes que se van celebrar los domingos, dende’l 18 d’ochobre hasta 20 d’avientu.

Itinerariu urbanu a cuenta de Miguel Díaz y Negrete. Tolos domingos sacante’l 22 de payares de 12:00 a 13:30 hores.
Taller familiar d’arquitectura. Domingo 22 de payares de 11:30 a 13:30 hores.

Pa Información ya inscripciones, con entrada llibre y gratuita hasta cubrir places, basta dirixir un corréu a info.museojovellanosgijon.es o solicitales nel teléfonu 985 18 51 52.

Fexe clic nesti enllaz pa descargate’l folletu de la esposición «Miguel Díaz y Negrete. Arquivu d’arquitectura (1947-2010)»