El llunes entamen en Villaviciosa les actividaes de l’Arribada 2009

L’Arribada, alcuentru lliterariu, llega esti añu a la so edición cuarta, y entama esti añu en Villaciosa, abriendo’l camín a “les arribaes” que van llevar actos a un conceyu cada añu. Del 14 de setiembre al 3 d’ochobre l’Arribada ufiertará recitales, homenaxes a lliteratos del país, esposiciones, presentaciones de llibros, tertulies, ponencies, comunicaciones, actuaciones…

Les actividaes van celebrase del 15 al 30 de setiembre nel Centru de Cultura Antiguu Institutu de Xixón y del 1 al 3 d’ochobre nel Muséu del Ferrocarril, cuntando amás con una xornada inaugural en La Villa, en collaboración cola asociación maliaya La Compaña del Ronchel.

La organización yá adelantó’l programa de la mesma, que va entamar a les 12 la mañana cola presentación de la reedición de “Peñas cantábricas” de Rafael Balbín de Villaverde; y el llibru “Las fiestas asturianas nuevas formas y viejos ritos” de David M. Rivas, a la una.

Amás, van facese delles comunicaciones de magar les 17:30 hores: “Dos proyectos del sieglu XIX: Puertu de Tazones y canalización de la Ría de Villaviciosa” de Senén Rivero; “Una bitácora sobre naturaleza y vida nel entornu de la ría de Villaviciosa” de Bernardo Busto y “Tazones y la ballena: una semeya con historia nel Muséu del Pueblu d’Asturies”. La xornada va completase con un Homenaxe a les pescaderes de Tazones a les siete la tarde.