El grupu punk-rock Skontra pon nes tiendes el so tercer discu

El grupu de punk-rock Skontra saca al mercáu’l so tercer trabayu discográficu de llarga duración “Mazcando Miseries”, que va tar disponible en tiendes esta mesma selmana y va presentase en directu n’Asturies a principios de 2011. Skontra, veterana formación asturiana entemez el so estilu streetpunk colos raigaños de la música tradicional asturiana.

Al igual que los anteriores ye autoxestionáu pero nesta ocasión cunta cola collaboración de les productores asturianes Algamar Producciones y Xunca Records. Na páxina web del grupu www.skontra.net podemos atopar dos de los cantares qu’inclúi esti discu:”Nel mio carcel” y “Santana”.

Presentación n’Europa

La banda acaba de tornar d’una xira pelos Paises Baxos y Alemaña xunto a la banda holandesa Circle J, no que foi un adelantu de la xira que tán diseñando de cara a la presentación estatal d’esti nuevu trabayu.

El trabayu discográficu, qu’inclúi 11 temes, recuperando dalgún clásicu de la primer maqueta del grupu, foi grabáu en Corvera nos estudios TUTU, cola producción musical de Sergio Rodríguez, y nél collaboraron diversos músicos de la escena asturiana.

Páxina del grupu