El grupu de teatru La Esfera actúa en Llugones

La entidá cultural de persones ciegues y con discapacidá visual va poner en escena “Europa, Europa”, un espectáculu que fala de la xenofobia a partir d’un testu de Etelvino Vázquez. La cita va ser esti xueves 15 d’avientu, a les 19.30 hores, nel Centru Polivalente Integráu de Llugones.

El grupu de teatru La Esfera representa “¡EUROPA, EUROPA!”, un testu de Etelvino Vázquez que nos fala d’un problema totalmente actual: la inmigración. L’espectáculu cunta la vida de Said, un emigrante africanu que llega a Europa en patera. A lo llargo de la obra vamos ver los distintos trabayos de Said y les sos relaciones cola población d’Europa.

Un alegatu en favor del inmigrante, en favor de la tolerancia y el respetu que siempres tendría de tar presente na relación ente un inmigrante y un nativu. Un espectáculu que fala de la xenofobia que nos arrodia y que, dacuando, fai que miremos pa otru llau.