El Gobiernu va baxar les hores lectives del profesoráu

El Gobiernu prepara una llei, que pretende tramitar con urxencia, para revertir los últimos puntos que queden a valir del decretu col que l’Executivu del PP enllantó en 2012 retayos nel sistema educativu y ente les cuestiones que va iguar atopase la baxa de les hores lectives del profesoráu.

La norma fundamentalmente quier terminar con dos situaciones refugaes dende un principiu pola comunidá escolar, como fueron l’aumentu de les hores lectives de profesores de colexos ya institutos y la non sustitución de les baxes de docentes que duraren menos de dos selmanes.

El restu de les midíes del decretu, como l’amenorgamientu hasta un 10% de les tases de reposición de los docentes que se xubilaben, que disparó hasta’l 25% los porcentaxes d’interinos, o l’enorme aumentu del númberu d’alumnos per aula, yá quedaron desactivaes desque en 2016 la tasa de reposición de maestros volvió al 100%.

En 2012, por orde del Conseyu de Ministros, el profesoráu de Primaria pasó a tener que dar un mínimu de 25 hores de clase a la selmana, cuando esa cifra yera’l máximu que se contemplaba hasta esi momentu, y el profesoráu de Secundaria pasó de 18 a 20 hores. Esta midida dexó aforrar sueldos de profesores, pero restó tiempu y posibilidaes para los planes de refuerzu y d’atención a la diversidá, para la preparación de temes, o para l’atención a les families. El compromisu de l’actual responsable d’Educación, Isabel Celaá, ye retornar agora a les hores lectives previes a la crisis. Otramiente, la norma volverá establecer que les sustituciones de los maestros de baxa va facer dende un entamu.

L’aprobación de la llei entá nun tien fecha, pero tendría de ser rápida, pos na actualidá les comunidaes autónomes preparen les instrucciones d’entamu del próximu cursu que tienen d’unviar a los centros, nes que los datos d’hores lectives, sustituciones o ratios son básiques para afitar el cupu de profesoráu.