El Garrapiellu organiza en Xixón una charra sobre la cultura’l texu

Mañana xueves, a les 19:30 hores, nel Atenéu Obreru de Xixón, asitiáu na cai Cuadonga, 7, El Garrapiellu va ufrir la charra d’Ignacio Abella , “La cultura’l texu, esplendor y decadencia d’un patrimoniu esencial”. A lo llargo d’esta esperiencia van presentar, al traviés d’imáxenes y hestories, “ún de los patrimonios naturales y culturales más desconocíos d’Asturies y d’Europa: los texos”.

Los texos cabo les ilesies y ermites, palacios, casones y otros llugares significativos de tolos nuesos pueblos tienen un estraordinariu valor pola so edá (munchos d’ellos centenarios) y pol so sentíu espiritual y simbólicu, cultural, social, paisaxísticu, históricu, etc.; como árboles centrales y de conceyu. Sicasí, nos últimos tiempos tán sufriendo un escontrillamientu aceleráu poles frecuentes obres ya igües que causen la so muerte o agonía enantes de tiempu. Pa El Garrapiellu “ye importante nesti momentu tomar conciencia de tolo qu’estos árboles significaron y signifiquen inda, y abordar la decidida proteición de tou esti llegáu, que representa un verdaderu patrimoniu de la humanidá”.

Ignacio Abella ye investigador, naturalista y escritor. Collaborador habitual d’Integral, Cuerpo Mente y otres publicaciones, tien escrito llibros como “El Hombre y la Madera”, “La Magia de los Árboles” y “La Memoria del Bosque”.