El fotógrafu Iván Morán García-Rendueles espón nel Valdecarzana sos paisaxes

Esta fin de selmana inaugurábase la esposición del fotógrafu Iván Morán García-Rendueles nel Palaciu de Valdecarzana d’Avilés que va permanecer abierta hasta’l xueves 23 de xineru.

El Palaciu de Valdecarzana acueye hasta’l día 23 una esposición d’Iván Morán García-Rendueles compuesta por una serie de fotografíes de paisaxes qu’impacten, impresionen y emocionen. Mar y cielu, praos y montes, flores y güertes, ríos y riberes recoyíos pola cámara de García Rendueles ufierten una amuesa de colores con un protagonismu que se graba na nuesa memoria remembrando unos llugares inolvidables.

La riqueza cromática asturiana nes distintes estaciones ye la tema d’esta serie fotográfica que recueye l’encantu y misteriu de praos, montes, flores, mar y cielu. “Cromática Asturies” da títulu a la esposición onde el colores y la lluz de la naturaleza son los protagonistes recoyíos pola mirada del artista.

Los paisaxes camuden coles estaciones y revelen la riqueza cromática d’una Asturies na que la Naturaleza y el color fúndense de tala forma que provoquen nel espectador un cúmulu de sensaciones partiendo del sentíu de la vista con una simple mirada.

Iván Morán García-Rendueles (Xixón, 1977) defínese como un autodidacta nel campu de la fotografía, un mundu nel que s’empecipió a los diez años cuando-y regalaron el so primer cámara.