El Festival Intercélticu d’Occidente tien yá programa pa la edición d’esti añu

Redacción.

La XI Edición del Festival Intercelticu d’Occidente va celebrase esti añu ente los díes 15 y 21 d’agostu na playa del Murallón en Tapia y los organizadores yá dieron anuncia del programa d’actividaes alredor de la música que va tener llugar esti añu na yá tradicional fiesta. El Festival d’Occidente va cuntar esti añu cola presencia de músicos de la talla del irlandes John Mcsherry o de los bretones David Pasquet Group.

El programa del Festival va tar compuestu esti añu por actuaciones en vivu y otru tipu d’actividaes que quieren ser a ‘animar a tou tipu de públicu’. Ente los grupos que van poder vese esti añu en Tapia tán los irlandeses ‘Lunasa’ y los asturianos ‘Llan de Cubel’ y ‘Tejedor’.

Ta previstu un calendarariu de conferencies y exposiciones a lo llargo de los díes de Festival, cuntando tamien cola ‘Noite Máxica’, una cita “enllena de soníos y colores, onde música, teatru y danza van dase la mano pa sorprender al públicu”. Amás, van celebrase actividaes dedicaes a la reciella, ente les que destaquen los xuegos tradicionales y los talleres de música, nos que va poder deprendese a tocar instrumentos como la zanfona o’l curdión diatónicu.