EL Festival Européu de la Canción en Llingües Minoritaries vendrá hasta Asturies na seronda de 2012

La Dirección Xeneral de Política Llingüística vieno acabante zarrar un alcuerdu de collaboración col Festival Européu de la Canción en Llingües Minoritaries, que va facer qu’Asturies seya en 2012 la sede d’esti alcuentru musical. El Festival celebraráse’l 20 de payares d’esti añu n’Inverness (Escocia); nel 2011 será n’Udine (Friul, Italia), y n seronda de 2012 n’Asturies, que va ser la primer comunidá española onde se celebre la gala europea.

La Directora Xeneral de Política Llingüística, Consuelo Vega Díaz, aconceyó ayeri col coordinador de la Fundación Liet, Onno Falkena, pa tratar les posibilidaes de desarrollu y collaboración del Festival Européu de la Canción en Llingües Minoritaries y la participación asturiana.

Según la nota de prensa qu’asoleyó esti martes la Conseyería de Cultura y Turismu l’alcuerdu cola Fundación Liet, que cuenta col apoyu del Conseyu d’Europa, considera a Asturies como sociu estratéxicu del Festival Européu y garantiza tamién la participación d’un representante asturianu nel Festival.