El Festival de Xixón estrena’l viernes l’asturiana “Subir al cielo”

Esti vienres, 22 de noviembre, el Festival Internacional de Cine de Xixón va acoyer l’estrenu de la película “Subir al cielo”, dirixida pola realizadora asturiana Lucía Herrera, dientro de la sección competitiva Gran Angular.La proyección va tener llugar nel teatru de la Universidá Llaboral de Xixón a les 20:15 hores. La película ta realizada so llicencia Creative Commons, de forma que cada miembru del equipu de trenta persones apurre una pequena parte pa producila.

La película, que ta rodada íntegramente n’Asturies, con más de 30 localizaciones esteriores, afonda nes relaciones personales de xente que va a la gueta d’afayar la so identidá, la certidume y les respuestes, pero sobremanera, afayase a sigo mesmos. Los protagonistes, Murias, Lois, Deva y Longrey, viven la so vida dientro de contradicciones inevitables: la edá, el pasu del tiempu, la maternu-paternidá. Amistá y relaciones de pareya metanes decisiones intermitentes. Tou ello cola perspectiva xeneracional que repasa les relaciones a los 20, 30 y 40 años.

La directora Lucía Herrera, y Juan Luis Ruiz, amigu, codirector y director de fotografía, empiecen a escribir dende la ficción. Sigún la nota de prensa d’anuncia del estrenu hasta esta película “yeren dos llocos filmando realidá dende la realidá. Agora nada y daqué ye real; tou y parte son ficción. Les sos referencies son “Deseyando amar” y “2046” de Wong Kar-Wai, “El Sur” de Víctor Erice, escritores como Julio Cortázar, Vila-Matos y John Berger, y directores de fotografía como Cristopher Doyle y, ¿por qué non?, el mesmu Juan Luis Ruiz”.

“Subir al cielo” ye un proyectu d’estructura y presupuestu minimalistas, que trata de romper coles convenciones de la industria cinematográfico. Nun cunta con ayuda pública dalguna, pero llogró texer una rede d’entidaes que sofiten el proyectu ufiertando los sos espacios, servicios o productos. Realizada so llicencia Creative Commons, cada miembru del equipu de trenta persones apurre una pequena parte pa producir un gran tou. Internet, les nueves formes de distribución y les redes sociales van conformar la esperiencia S.A.C.-acrónimo del títulu- más allá de la gran pantalla. COLLABORACIONES La película cunta cola collaboración d’Elle Belga y Nachu Vegues, quien interpreta’l papel de Vigo. Amás d’actuar, el xixonés toca xuntu cola so banda’l cantar “La ciudá más murnia”, con lletra afecha a la hestoria de los protagonistes. Y ye que la música de “Xubir al cielu” ye la so propia xénesis, constrúi espacios y personaxes colos cantares del propiu Nachu Vegues, Elle Belga, The School, Love of Lesbian, La bien quería, Kitten cake, etc., y la fisicidad d’una fotografía que nos asitia dientro de la hestoria.