El discu nuevu d’Anabel Santiago yá tien nome: ¡Agora!

A entamos d’abril Anabel Santiago negábase a dicinos el nome del so discu nuevu “por una cuestión de superstición”, pero mes y mediu más tarde, yá podemos conocelu, el discu nuevu de la voz más célebre de la nueva tonada llámase ¡Agora! y va presentase nel Xardín Botánicu de Xixón, el sábadu que vien, 22 de mayu. La cantadora contábanos que’l procesu del discu foi “sorprendentemente rápidu y eficaz, con una conexón especial colos músicos y técnicos”, cuntando con Héctor Braga como productor musical.

Amás Santiago considera qu’esti “ye un discu enforma especial y diferente” pa ella, pues “aparte d’autoeditame y autoxestiname soi tamién la compositora y lletrista de munchos de los temes que lu componen, polo que la interpretación siempres ye más personal y dedicada, más cuidada”. Nel discu hai temes nuevos y temes tradicionales versionaos, “con sellu mui personal”, según confesó l’artista.

Nel discu collaboren miembros de la nueva banda d’Anabel Santiago: Héctor Braga, Eduardo Salueña (Cuac, Senogul), Manuel Cordero (Ástura) y Borja García (Muñeco Vudú, Los Ministros).

Entevista a Anabel Santiago n’Asturnews, na qu’adelantaba delles novedaes del discu