El Conseyu de Gobiernu aprebó fuera del orde del día la creación de les sociedaes de radio y TV sin el sofitu d’IX-Bloque

El Conseyu de Gobiernu del Principáu aprebó na so xunta del xueves, pero fuera del orde del día, la creación de les sociedaes de radio y TV autonómiques, lo qu’enfadó abondo a los conseyeros d’Izquierda Xunida-BA que nun tan un res d’alcuerdu con cómo se tan faciendo les coses nel procesu de selección, sigún pudo saber Asturnews. Al paecer, el PSOE nun comunicó a IX que tenía la intención d’aprebar nesa reunión cabera les sociedaes porque n’IX nun taben d’alcuerdu con facelo enantes d’afitar les bases de cómo sedría la programación d’eses sociedaes en llinees xenerales y enantes de dexar mui nidio cómo se fadrá la selección del personal y cómo se tendrán en cuenta los méritos pa la mesma.

Conforme a los datos qu’ufiertara’l director xeneral de la TV autonómica n’Asamblega de l’Asociación de la Prensa d’Asturies de xunu, en cuantes s’aprebara la creación de les dos sociedaes les pebes de selección podríen convocase darréu y cellebrase nel mesmu mes d’agostu.

Izquierda Xunida desixó’l mes pasáu na comparecencia del direutor xeneral del ente públicu asturiano de radio y televisión, José Ramón Pérez Ornia, na comisión de control de la Xunta Xeneral que la llingua asturiana seya requisitu fundamental na convocatoria de delles places nes oposiciones que tan previstes pa formar la plantilla de la futura Televisión Autonónomica. La petición d’IX facíase depués de qu’Ornia dibuxara’l pior de los escenarios posibles sobre l’usu de la llingua asturiana na TV nel desendolcu de l’Asamblega de l’Asociación de la Prensa d’Asturies una selmana atrás cuando dixo que la llingua asturiana nun diba ser nin requisitiu nin tan siquier méritu nes oposiciones pa la TV Autonómica.

IX desixe que la llingua asturiana seya un requisitu fundamental pa delles places de la TV autonómica