El Conservatoriu d’Avilés programa en payares seis eventos na ciudá

El Conservatoriu d’Avilés programa en payares seis eventos na ciudá. Tratase del XV Foru Solidariu, “Música na Biblio”, la Nueche Negra, el Día de les Ciudaes Educadores, el conciertu Warcry Symphonic y el recital de Santa Bárbara y Navidá en Llaranes.

El Conservatoriu Municipal Profesional Julián Orbón d’Avilés va participar mientres el mes de payares nun total de seis eventos al marxe de la so actividá académica regular, dando asina continuidá a la so voluntá de sacar la música de les sos aules a les cais y espacios públicos de la ciudá.

El primeru de los referíos actos foi un conciertu nel marcu del XV Foru Solidariu d’Avilés. Un cuartetu de vientu madera formáu por alumnáu del profesor José Morató va ufiertar un recital nel Salón d’Actos del Palaciu de Camposagrado, a la conclusión de la conferencia “¿Qué apurre l’Oxetivu 5 de Desenvolvimientu Sostenible a la igualdá y el empoderamiento de les muyeres?”. Foi esti miércoles 7 de payares, a les 19:45 hores.

El segundu de los conciertos va ser esti martes 13 de payares, a les 18 hores, cuando un alumnáu de distintes especialidaes instrumentales va participar nun conciertu pedagóxicu empobináu a públicu infantil d’ente 5 y 8 años d’edá, nel marcu de l’actividá Música na Biblio”. El recital va tar empobináu y presentáu pol profesor Iván Cuervu.

Ente la gran ufierta d’actividaes culturales que van poblar el programa de la Nueche Negra d’Avilés 2018 van atopase conciertos de distintes agrupaciones d’alumnos y alumnes del Conservatorio. Toos ellos van tener llugar el vienres 23 de payares, con un programa que se va presentar llueu, y que como ye habitual va desenvolver en distintos allugamientos de la ciudá.

El sábadu 24 de payares, la banda asturiana de heavy metal Warcry va llegar al Centru Niemeyer col so conciertu “Warcry Symphonic”, nel que van repasar los sos grandes ésitos en formatu sinfónicu acompañaos por una gran orquesta d’alredor de 60 músicos. Esta orquesta va tar formada por intérpretes tantu de la Orquesta Sinfónica “Julián Orbón” como de la Nueva Orquesta Sinfónica de Cantabria. Va Ser a partir de les 21 hores. Amás, mientres les xornaes previes al conciertu, alumnáu del Conservatorio va participar nos talleres de divulgación impartíos por músicos de WarCry nel Teatru Palacio Valdés, enmarcaos nel proyectu de formación musical entamáu pela banda en collaboración coles conceyalíes d’Educación y Cultura.

Per otru llau, el mesmu sábadu 24 de payares va tener llugar la XII Edición de los Conciertos de Santa Bárbara y Navidá en Llaranes. Nellos va participar el coru de voces blanques del Conservatorio, con acompañamientu de pianu y so la dirección d’Isabel Baigorri. Va Ser a partir de les 18:45 hores na Ilesia parroquial de Santa Bárbara de Llaranes.

A lo último, el vienres 30 de payares celebrarase’l Día Internacional de les Ciudaes Educadores. El Coru del Conservatorio, dirixíu por Isabel Baigorri, va participar nel programa d’actos qu’Avilés va entamar por cuenta de esta fecha y va interpretar el cantar creáu pa la ocasión pola Asociación de Ciudaes Educadores. Va Ser a partir de les 17:30 hores nel antepar del Conservatorio.