El Conceyu d’Uviéu va subvencionar con 300.000 euros les escueles deportives y los centros de tecnificación

La Xunta de Gobiernu municipal dio la selmana pasada lluz verde a la convocatoria de subvenciones a escueles deportives, centros de tecnificación deportiva, y a les escueles deportives pa persones con diversidá funcional, una convocatoria que cunta con 300.000 euros, de los que 120.000 correspuenden al presupuestu d’anguaño, y 180.000, al del añu que vien, yá que cubre l’actividá deportiva nel conceyu mientres el cursu escolar.

Les escueles deportives, pa neños y neñes ente los 6 y los 17 años, van tener pa los usuarios un preciu máximu al añu de 120 euros añales. Per primer vegada, los fíos de families colos sos proxenitores en paru van tar exentos de pagu, según establecen les bases de la convocatoria. “L’oxetivu ye que nengún neñu d’Uviéu quede esti cursu ensin faer deporte porque la so familia nun disponga de medios económicos. El deporte ye básicu pa la salú y l’educación de los neños y neñes, y el so fomentu ye una de les prioridaes d’esti gobiernu”, señaló la concejala de gobiernu d’Educación y Deportes, Merced González.

Les subvenciones tán dirixíes a clubes deportivos del conceyu, en “trés ámbitos básicos na promoción del deporte base na ciudá, que dexen y faciliten l’acercamientu a l’actividá deportiva de los escolares y persones con diversidá funcional”, según señalen les bases de la convocatoria. Tocantes a los centros de tecnificación, el so oxetivu ye ameyorar el nivel técnicu de deportistes con base pa preparar pa la media y alta competición.

Tocantes a les escueles deportives, son subvencionables delles actividaes que van del axedrez al atletismu, pasando pol bádminton, baloncestu, balonmano, béisbol y softbol, bolos, ciclismu, fútbol femenino, golf, h.oquei sobre patinos, yudu, karate, natación, natación sincronizada, patinaxe, priagüismo, rugby, tenis, tiru olímpicu, triatlón, voleibol. Pa los centros de tecnificación: axedrez, atletismu, baloncestu, balonmano, ciclismu, ximnasia rítmica, halterofilia, h.oquei sobre patinos, natación, patinaxe de velocidá, rugby, tiru olímpicu y voleibol. Pa les persones con diversidá funcional, va subvencionase’l multideporte (atletismu, bádminton, baloncestu, esgrima, fútbol sala, golf, yudu, karate, natación…)

Les escueles deportives y de deporte pa persones con diversidá funcional van desenvolver la so actividá del 1 d’ochobre al 31 de mayu, dientro del cursu escolar, dambos inclusive. Nel casu de los Centros de Tecnificación, cuidao que se contempla la participación en competiciones oficiales, la so actividá podría enllargase hasta la finalización de les mesmes. La planificación y la programación que se presente tendrá d’ufiertar un mínimu de dos sesiones selmanales con cada grupu y con una duración mínima d’una hora por sesión.