El Conceyu d’Uviéu presenta en Madrid les Xornaes del Desarme

Impulsar el turismu uvieín más allá de les nueses fronteres y potenciar la fiesta del Desarme, declarada d’Interés Turísticu Rexonal son los oxetivos qu’escorría’l conceyu d’Uviéu col actu celebráu esta selmana en Madrid, y qu’axuntó a personalidaes del ámbitu culinariu, periodistes y autoridaes en redol a la fiesta del Desarme, la celebración gastronómica más emblemática de la ciudá.

Mientres l’actu, al qu’asistieron ente otres autoridaes l’embaxador de la Federación de Rusia n’España, Yuri Corchagin, y l’alcalde de Madrid, José Luis Martínez Almeida, y el Padre Ángel, Alfredo Canteli, alcalde d’Uviéu, destacó que “na actualidá, esti acontecimientu va muncho más allá. Creció y evolucionó hasta convertise n’unu de los mayores emblemes gastronómicos d’Uviéu y nun motivu d’arguyu pa tolos uvieinos”.

De la mesma, l’alcalde d’Uviéu quixo poner de relieve’l so compromisu pa potenciar “toes aquelles actividaes entamaes por OTEA y la Confrería del Desarme y que supongan dinamizar la ciudá”, recordando “que’l turismu gastronómicu ye un activu bien importante pal conceyu uvieín, recordando que “cada vez son más quien escueyen los sos destinos de vacaciones en función de la cocina local o de los eventos culinarios que tienen llugar en cada ciudá”, polo que pal rexidor uvieín “sería imperdonable que nun aprovecháramos la calidá y la variedá de la hostelería uvieina pa convertir a Uviéu na capital de la gastronomía asturiana”. Alfredo Canteli nun quixo dexar pasar la oportunidá pa falar de futuru, y amosó el so enfotu en poner en marcha n’Uviéu “xuna gran feria de seronda, que sirva pa xenerar actividá na ciudá” xuna idea na que yá se ta trabayando.

Otru de los puntos fuertes del discursu del rexidor uvieín tuvo que ver cola “Capital Española de la Gastronomía”, títulu nel qu’Uviéu yá ta trabayando y que podría tener resultancies granibles a bien curtiu plazu. Cabo recordar que ciudaes cercanes a Uviéu yá ostenten esti títulu, casu de Llión, que lo llogró nel añu 2018.

El presidente de OTEA, José Luis Álvarez Almeida, y el Cofrade Mayor de la Confrería del Desarme, Miguel Ángel de Dios, quixeron destacar les múltiples actividaes que se van a llevar a cabu y que van xirar en redol al Menú del Desarme, actividaes que van empezar en próximu 17 d’ochobre y que se van desenvolver hasta’l próximu 20, como la recreación histórica de les Batalles del Desarme, que van tener llugar los próximos 19 y 20 d’ochobre. Álvarez Almeida quixo destacar que nesta edición van participar más de 70 establecimientos, polo que la iniciativa volverá ser tou un ésitu.