El Conceyu d’Uviéu abre la convocatoria por que les ONGs contraten personal desemplegao nos sos proyectos sociales

El Conceyu d’Uviéu abre la convocatoria por que les ONGs contraten personal desemplegao nos sos proyectos sociales, al traviés de Servicios Sociales que va destinar 1 millón d’euros a les ayudes, que s’estremen en trés llínees d’actuación y que’l so plazu de solicitú remata’l 15 de payares.

La Xunta de Gobiernu del Conceyu d’Uviéu aprobó’l pasáu 19 d’ochobre la Convocatoria de Subvenciones a Entidaes ensin Ánimu d’Arriquecimientu para la Contratación de Persones Desemplegaes del Conceyu d’Uviéu nel exerciciu 2018. El testu, publicáu nel BOPA del 31 d’ochobre, consta de trés llínees distintes d’actuación y cuenta con un presupuestu de 1 millón d’euros. Pueden ser oxetu de subvención les entidaes que presenten proyectos d’interés públicu y social que tean directamente rellacionaos colos fines que vienen executando y que supongan xeneración d’empléu..

Les iniciatives van ser dirixíes a persones con discapacidá, en situación de dependencia, esclusión o precariedá social y van deber evidenciar el beneficiu que supon el so desenvolvimientu, y les actuaciones concretes que se van poner en marcha para algamar dichos oxetivos. Va poder tratase de proyectos nuevos o bien complementariu d’otres actividaes habituales de les ONGs solicitantes y tendrán de ser emprestaos poles organizaciones en réxime d’alministración directa. Amás, tendrá de favorecese la formación y la práctica profesional de les persones desemplegaes que sían contrataes.

La convocatoria componese de trés llínees d’actuación estremaes. La Llínea 1 (500.000 €) dedícase a proyectos empobinaos a persones con discapacidá, o en situación de dependencia, precariedá o esclusión social. Van Ser intervenciones de ciertu valumbu que supongan la contratación de siquier 4 persones y que’l so presupuesto sía cimera a 80.000 €. Amás, con calter xeneral, han de tar rellacionaes con un itinerariu formativu para favorecer l’insertamientu llaboral futura. La Llínea 2 (100.000 €) tien como oxetivu la contratación de personal d’alministración y/o personal d’oficios que suponga una meyora de la estructura de xestión de la entidá beneficiaria. A lo último, el puntu d’enfoque de la Llínea 3 (400.000 €) ye’l de proyectos d’interés social qu’impliquen la contratación de personal para realización d’actividaes nueves o complementaries de les que vien realizando davezu la entidá que la presente. Cada entidá solicitante solo va poder presentar un proyectu.