El Club Xeitu prepara un discu con poemes de Melchor Rodríguez Cosmen

El Club Cultural Xeitu del Monte Occidental Asturlleonés peracaba estos díes la grabación d’un discu n’homenaxe al recordáu escritor pal.luezu Melchor Rodríguez Cosmen. La organización, que trabaya na defensa de la variedá pal.lueza del asturianu, falada nos montes asturlleoneses suroccidentales, quier celebrar asina’l centenariu de la so nacencia.

Ñacíu en Madrid anque natural de L.laciana y L.leitariegos, Melchor Rodríguez Cosmen foi un conocíu estimulador cultural del monte ástur-lleonesa, como recuerden dende Xeitu.

El discu que prepara Xeitu va recoyer pieces de folclore grabaes fai más de veinte años ya interpretaes por el mesmu Rodríguez Cosmen con curdión, panderu, pandereta y birimbáu, preséu esti postreru del que foi auténticu maestru. Tamién van apaecer poesíes na variedá pal.lueza recitaes pol mesmu autor y otres de la so autoría, delles inédites, lleíes por dalgunos de los más conocíos autores y divulgadores d’esta variante del dominiu llingüísticu asturlleonés.

Ente ellos, amás del so sobrín José Ramón Blanco, tán Roberto González-Quevedo, Emilce Núñez, Guadalupe Lorenzana, Manuel Gancedo, Eduardo Carbajo, Severiano Álvarez y Rita García. El discu, que va apaecer en próximes selmanes, va incluyir un cuadernín con notes sobre l’autor y toles poesíes lleíes xunto con testos y semeyes.