El campus de Mieres amplía so ufierta con un nuevu programa doctoral

El campus universitariu de Mieres va amplíar la so ufierta con un nuevu programa doctoral sigún pudo sabese nel actu inaugural de la séptima edición de les Xornaes Internacionales Doctorales de la Universidá d’Uviéu, eventu que sirve de foru d’alcuentru de los casi 200 doctorandos que realicen les sos tesis na rexón.

Foi la directora de la Escuela Politécnica, Asunción Cámara, quien indicaba que’l Principáu autorizó la implantación del que va ser el primer programa doctoral en Barredo. «Tratase d’un llogru bien importante; costó esplicar esta necesidá nel senu de la comunidá universitaria porque’l plan nun podría depender de departamentu dalgunu yá que escarecemos d’ellos», señalaba la responsable del centru.

Ello ye que la iniciativa, que se va poner en marcha nel cursu 2019/2020 va tar venceyada al Indurot, l’Institutu de Recursos Naturales y Ordenación del Territoriu. «Nunca se fixera esto antes n’Asturies». Cámara esplicaba que, primeramente, el programa tien que ser aprobáu pola Axencia Nacional d’Evaluación de la Calidá y Acreditación (Aneca). «Tábamos teniendo problemes por que los nuesos estudiantes de doctoráu entraren n’otros programes nos qu’había una demanda bien grande ,y que taben bien alloñaos, na mayoría de los casos, de la formación técnica que s’ufierta en Mieres», argumentaba Cámara. «Ye un plan qu’apenes tien un gastu añedíu pa la Universidá, yá que se trata d’una ordenación alministrativa, y los estudiantes van poder tar inscritos equí con actividaes d’investigación». Nos últimos años, contabilizáronse una quincena de comenenciudos na Politécnica. «Tuvimos qu’unvialos a programes esternos, d’otres universidaes porque equí acabábense los cupos».