Educación ve “xustu” el sortéu pa les places de billingüismu

La Conseyería d’Educación diz que ye “xustu” el sortéu pa les places de billingüismu y quier dexar afitao que ta “analizando los casos” nos que l’alumnáu d’ESO quedó escluyíu por haber más demanda qu’ufierta.

La Conseyería d’Educación aseguró esti día que ta analizando los casos de los alumnos escluyíos en Secundaria del Programa de Billingüismu tres el sortéu realizáu pelos centros que cuntaben con más demanda qu’ufierta. Padres de 31 alumnos del IES Fernández Vallín, Montevil (Xixón) y del de Candás (Carreño) denunciaron esti sistema nel que s’inclúi a tolos estudiantes qu’echaron la solicitú y que busca garantizar el mesmu derechu a aportar a una plaza que dexe cursar la ESO n’español ya inglés. Creen “demagóxico y discriminatorio” que nun se siga nengún criteriu y “nun se valore l’esfuerzu” de quien más estudiaron y llograron meyores notes. Porque “hai quien con una calificación de 9,5 quedóse fora,  ente qu’hai afortunaos que raspien l’aprobáu”.

El departamentu que dirixe Genaro Alonso sorrayó ayeri que col sortéu tolos centros actuaron conforme a la norma. Y ye que’l resolvimientu de xunu de 2015 establez que, n’Educación Secundaria, «el númberu de grupos ufiertaos va quedar supeditáu a los recursos de los que disponga’l centru. En casu -prosigue- de que nun se pueda atender tola demanda, va efectuase un sortéu públicu». “Ye’l sistema que nos paez más xustu”, señalaba’l Conseyeru, magar los pidimientos de les families y de grupos como’l PP por que lleven a cabo modificaciones nes normes alministratives que regulen esta cuestión.