Educación va invertir 700.000 euros nes oposiciones pal Cuerpu de Maestros

El conseyeru d’Educación y Cultura, Genaro Alonso, sorrayó la selmana pasada l’apueste por amenorgar el porcentaxe d’interinidá del profesoráu n’Asturies cola inversión de 700.000 euros pa la ufierta d’emplegu públicu al Cuerpu de Maestros previstes pa 2017.

Alonso compareció’l vienres ante la Comisión de Facienda de la Xunta Xeneral pa informar sobre’l presupuestu del so departamentu pa 2017, con cuentes que xuben a 782.784.536 euros, lo que supon una medría del 1,2% sobre esti exerciciu. L’aumentu, que se produz per segundu añu consecutivu, cifrase en 9.279.031 euros que se van empobinar a la creación d’emplegu públicu y l’afitamientu de la calidá y la equidad educativa.

En relación al procesu selectivu, Alonso nun cifró’l númberu de places pa esta oposición docente en Primaria ya Infantil a la espera de conocer la tasa de reposición que dicta’l Gobiernu central y el númberu maestros qu’apuerten mientres esti cursu a la xubilación. A entrugues de la diputada d’IX Concha Masa, precisó que sería “prematuru” dar una cifra antes de conocer estos datos, pero recaló que la so intención ye “dir al máximu” del númberu de places que dexe la tasa de reposición.

El conseyeru indicó qu’esti apueste por amenorgar el númberu de profesores interinos ye una continuación de la llínea siguida l’añu pasáu convocando “la mayor ufierta d’empléu públicu de personal docente dende l’asunción de les tresferencies educatives nel añu 2000, con 418 places n’Educación Secundaria”.