Educación satisfái a los padres y retaya en dos díes la selmana de vacaciones de payares

La Conseyería d’Educación decidió ayeri atender los pidimientos de la mayor parte de les federaciones de padres, retayando en dos díes la selmana de vacaciones de payares.

De los dos propuestes que plantegara, una con una selmana de vacaciones del llunes 29 d’ochobre al domingu 4 de payares, el departamentu de Genaro Alonso inclinarase a lo postrero pola más tradicional. Asina, a finales d’ochobre, en cuenta de siete díes, los escolares van tener cinco díes festivos namái, como asocedió esti cursu. Va Ser del miércoles 31 d’ochobre hasta’l 4 de payares.

Una de les novedaes cimeres ye que va haber un macropuente de cinco díes per Antroxu, xuniendo’l vienres 1 de marzu a la fin de selmana, el llunes 5 y el martes de Antroxu, día 6, cuando anguaño hubo cuatro díes festivos. La conseyería sostien que, estableciendo estos tiempos de descansu nel primera y segundu trimestre, permédiense los periodos lectivos, una demanda que lleva años faciendo la xunta de personal docente, anque con un planteamientu distintu.

La Selmana Santa va adelantrase y nun va empezar el Xueves Santu, como esti cursu, sinón el Llunes Santu (15 d’abril) y va durar hasta’l domingu 21 d’abril, inclusive, al mesmu tiempu que va suprimise el Llunes de Pascua (22 d’abril) como non lectivu -que taba incluyíu en dambes propuestes de la conseyería-, en cuenta de les concesiones feches en payares y Antroxu. Los últimos cambeos afecten a la fin de les clases de Primaria. En vegada del 21 de xunu, como anguaño, van rematar el día 19. Y va caltenese’l día 25 de xunu como conclusión de les de Secundaria, como ciscaben el directores d’esta etapa, y non el día 27, como venía recoyida n’una de les propuestes d’Educación. En total, caltiénense 177 xornaes lectives.