Educación pide a los centros una fueya de ruta hasta final de cursu con xeres afeches

Educación vieno acabante de pedir a los centros una fueya de ruta hasta final de cursu con xeres afeches. Toles miraes tán puestes na xunta d’esti miércoles  ente’l Ministeriu d’Educación y les comunidaes autónomes pa esclariar tolos interrogantes colos qu’empieza esti final de cursu, colos alumnos confinaos nes sos cases.

A la espera d’un marcu común, a partir del cual la Conseyería d’Educación va publicar instrucciones concretes, el departamentu que dirixe Carmen Suárez pidió a los centros un plan de trabayu pal tercer trimestre que, «nel peor de los escenarios imaxinables pudiera concluyir ensin la vuelta presencial a les aules».

Tienen de plazu hasta’l día 25 d’abril y nél tienen de concretar cuatro aspeutos: qué criterios van siguir pa escoyer y entamar les xeres que propongan al alumnáu; los criterios pa la so valoración, cómo se van a coordinar ente profesores y qué calces van siguir pa comunicase con alumnos y families.

Tocantes a les xeres, la conseyería aportuna no que yá foi comunicando, anque inclúi dalguna novedá. Esto ye, vuelve sorrayar que’l trabayu va centrase na «consolidacion de competencies clave, ensin avanzar nuevu conteníu curricular», salvo en segundu de Bachilleratu y segundu cursu de ciclos de FP, «siempres y cuando l’alumnáu pueda aportar en condiciones d’igualdá».

La novedá ta en que, precisamente p’afondar neses competencies clave, encamienta «priorizar proyectos de trabayu qu’impliquen a más d’un área o materia, en llugar de la realización d’actividaes acumulatives ensin conexón dalguna ente sí».

Ye esti aspeutu nel que paez más interesada la conseyería. Ello ye que na circular previa al pidimientu d’esta fueya de ruta, sostien que considera «necesariu poner l’acentu más na propuesta d’actividaes relevantes pal aprendizaxe non presencial que na evaluación en sí del alumnáu, polo qu’animamos a ser flexibles nes decisiones qu’afecten a la evaluación y la calificación».

Va ser el tutor quien apigure les propuestes que provengan de los departamentos y equipos docentes pa programar l’actividá a distancia, de manera -diz Educación- que «les xeres propuestes sían afeches en cantidá, tiempu y medios a utilizar a les circunstancies personales y familiares del alumnáu».

Llegáu a esti puntu, reclama que se tenga en cuenta la fienda dixital, la situación de quien nun disponen de medios telemáticos pal siguimientu del so procesu «teniendo de prevese la forma en que pueda llegase a toos». La evaluación final va faese teniendo en cuenta la evolución del alumnáu antes del 13 de marzu, cuando se suspendieron les clases, y la valoración de les actividaes d’aprendizaxe a distancia, «como valor añedíu».

«Nun añedir nada nuevo», «sobrecarga al profesoráu» fueron dalgunes de les reacciones de los sindicatos, quien indicaron que la conseyería pretende reactivar les convocatories d’interinos. Reclamen que se cubran toles baxes y non solo les que crea prioritaries.