Educación pide a los centros sos necesidaes pa tener aules de 20 alumnos

La Conseyería d’Educación solicitó a los centros de toa Asturies les sos necesidaes pa poder faer agrupaciones ‘burbuya’  como les que mentaba’l ministeriu o grupos d’ente 15 y 20 alumnos, con un solu docente de referencia, que podríen tener una relación normal ente ellos y que sí caltendríen les distancies respecto al restu del alumnáu. Esta organización podría aplicase a Infantil y los primeros cursos de Primaria, hasta cuartu.

Teniendo en cuenta que les ratios oficiales tantu d’Infantil como de Primaria son averaos a eses cifres, munchos centros tienen aules que superen los 15 o los 20 alumnos. Por eso, la conseyería precisa saber qué previsión de matriculación tienen los colexos ya institutos, cuál ye la ocupación de les sos aules, qué espacios tienen disponibles pa doblar grupos en casu de que fuera necesariu… Pero tamién ye necesariu saber cuánto profesoráu más habría qu’incorporar a la plantiya y qué medios tecnolóxicos falten p’acabar cola fienda dixital que tantos problemes traxo nesti últimu trimestre.

El llunes entama’l procesu de solicitú de places pa los neños y neñes que s’incorporen al sistema educativu. Esto ye, pa los nacíos en 2017 y qu’en septiembre tienen d’empezar primero d’Infantil. Tamién ye’l plazu pa solicitar los cambeos de centros.