Educación diseña planes de continxencia énte posibles zarros el próximu cursu

Educación va diseñar planes de continxencia énte posibles zarros el próximu cursu por otru biltu. Ministeriu y conseyería tan dispuestos a entamar pruebes estraordinaries pa llograr el títulu de cuartu d’ESO y segundu de Bachilleratu y de FP.

Vien recoyío nel alcuerdu al que llegaron ministeriu y autonomíes dientro de la Conferencia Sectorial d’Educación: dos tales alministraciones -la central y la rexonal- van diseñar, con vistes al próximu cursu, planes de continxencia énte la posibilidá de qu’un nuevu biltu de coronavirus cierre otra vegada colexos ya institutos. Ye unu de trés grandes ‘deberes’ que se ponen na preparación del añu escolar 2020-2021. «Poder responder a posibles nuevos periodos d’alteración de l’actividá lectiva provocada pol COVID-19». Ponse asina l’Alministración nel peor de los casos, na llínea de quien piensen que, mientres nun haya tratamientu efectivu o vacuna, puede haber nuevos periodos de confinamientu.

Los otros dos oxetivos son afaer el currículu del próximu añu cola materia que quedó ensin dar y preparar planes de recuperación. L’oxetivu ye que si aquel día la situación volvió a la normalidá, los alumnos puedan avanzar, especialmente los más arrezagaos.

Amás, nun momentu nel que tolos docentes almiten que la situación obligólos a formase en tiempu récord y reinventase casi de la nueche al día, el ministeriu pretende, xuntu coles comunidaes, qu’un grupu d’espertos analice la esperiencia acumulada nesti periodu «y emitir encamientos pa la transición a la escuela dixital y pa tar nes meyores condiciones énte situaciones similares».

Na rueda de prensa qu’ufiertaron la selmana pasada tantu la ministra, Isabel Celáa, como la conseyera asturiana, Carmen Suárez, dambes refiriéronse al grupu de trabayu qu’analizaría los cambeos de temariu pal próximu cursu, pero nenguna mentó los planes de continxencia.

Sía como fora, los alcuerdos faen especial fincapié na necesidá de modificar los oxetivos de les programaciones de cada nivel, y de «flexibilizar» los criterios de promoción.

Porque eso sí quedó claro: l’oxetivu ye que la mayoría del alumnáu pueda pasar de cursu, especialmente los que s’atopen a final d’etapa. «La titulación tien de ser la práctica habitual pa los alumnos de cuartu d’ESO y segundu de Bachilleratu y FP, pa lo cual les alministraciones van afaer los criterios esixentes pa llograla, pudiendo entamar pruebes estraordinaries de recuperación y titulación a les que van poder presentase quien lo deseyen, con posibles exenciones de partes d’estes».