Educación cifra en 1.106 les places de la tasa de estabilización

La conseyería treslladó la selmana pasada a los sindicatos la so propuesta d’aplicación n’Asturies del Alcuerdu pa la meyora del Emplegu Públicu robláu’l pasáu mes de marzu por sindicatos y Gobiernu central, que contempla 1.106 places na denominada tasa adicional pa la estabilización d’emplegu temporal y los sindicatos amuesaron yá la so disconformídá pa cola propuesta.

Pa llegar a esa cifra contabilícense toles vacantes con dotación presupuestaria que tuvieren ocupaes por funcionarios interinos los trés últimos años. Según detalló Suatea, son 702 de maestros, 284 de profesores de Secundaria, 72 de Formación Profesional (FP), 24 de Música y artes escéniques, 5 d’Escueles Oficiales d’Idiomes, 15 d’Artes plástiques y diseñu y 3 de Maestros de taller.

Les oposiciones que se convoquen en 2018 (Secundaria) y 2019 (Primaria) ufiertaríen eses 1.106 places más les correspondientes a la tasa de reposición, esto ye, les derivaes de les xubilaciones de profesores, que nel ámbitu docentes ye del 100%. Según cálculos d’ANPE, resultaríen unes 725 places en Secundaria y unos mil en Primaria. «Nun nos cuadren los númberos», dicen dende’l sindicatu educativu.

Tanto ANPE como Suatea y UXT califiquen de «insuficiente» y «bien per debaxo de les mires xeneraes» la propuesta cola que la Conseyería d’Educación se presenta esti añu. Y cuestionen qu’eses cifres dexen amenorgar la temporalidá na educación asturiana -del 30% aprosimao- al 8%, como prevía l’alcuerdu estatal.

Tamién coinciden les organizaciones sindicales na necesidá de que’l procesu selectivu reconoza y valore la esperiencia docente del personal interinu y asina-y lo treslladaron a la conseyería por que la faiga constar na Conferencia Sectorial d’Educación, una y bones la regulación del sistema d’oposiciones ye de competencia estatal. Nesti sentíu, UXT demanda que les pruebes nun sían eliminatories, que s’amonte la fase de concursu frente a la d’oposición na calificación global respetando l’equilibriu de méritos, capacidá ya igualdá, que nun se modificar el temariu y un aumentu de la optatividad pa escoyer la tema y l’unidá didáctica que tienen de defender el opositores.

ANPE tamién reclamó la convocatoria de places d’accesu a cátedres, poles que munchos profesores de Secundaria lleven aguardando dos décades. El xueves los sindicatos tán llamaos a una nueva xunta cola conseyería.