Educación abre’l plazu de matrícula de la rede d’escueles infantiles n’Uviéu

La Xunta de Gobiernu del Conceyu d’Uviéu aprobó esta semana pasada la convocatoria d’almisión nes escueles infantiles pal cursu 2018-19 y la conceyalía d’Educación ya entamó  a recoyer pidimientos a partir d’esti llunes.

“Los padres y madres de menores de trés años del conceyu uvieín que tean interesaos puen solicitar plaza hasta’l 27 d’abril”, señaló la conceyala Mercedes González, que recordó que tienen tamién a la so disposición una serie de bonificaciones sobro’l preciu de matrícula que se conceden en función de criterios como la renta familiar.

Uviéu cunta con siete escueles infantiles (Rubín, Dolores Medio, La Florida, María Balbín, Montenuño, Cualloto, y La Corredoria), que sumen unes 600 places. Pa optar a elles, tien de presentase una solicitú que puede recoyese nos mesmos centros y nos rexistros municipales (el Xeneral cai Quintana, o l’auxiliar de La Corredoria). Nos mesmos llugares ufiértase información de la documentación necesaria pa realizar el procesu.

Pa solicitar plaza nes escueles infantiles, los padres y madres o tutores de los neños y neñes menores de trés años  tienen de morar o trabayar nel conceyu d’Uviéu. Nesti sentíu, cabo tener en cuenta que se considera casa familiar aquel en que consten empadronaos los padres o tutores de los alumnos.

A pesar de que la matrícula pue realizase con anterioridá, la incorporación de los alumnos y alumnes almitíos nun podrá facese primero que cumplieren los trés meses d’edá.