Portada Educación Educación abre una investigación polos datos confidenciales d’opositores

Educación abre una investigación polos datos confidenciales d’opositores

by redacción asturnews

Un documentu de ventiocho páxines, colos nomes y DNI de los aspirantes a les places d’Hestoria de les oposiciones al cuerpu de Secundaria, apaeció esta selmana nos foros d’internet. Una filtración de documentación que tenía de ser confidencial hasta que se produza’l resolvimientu oficial de la conseyería y que xeneró esmolición ente los docentes.

Ante esta filtración, el departamentu que dirixe Carmen Suárez salió al pasu pa esplicar lo asocedío y señaló que “nun hubo nin robu nin hackeo na seguridá de los archivos dixitales del Principáu d’Asturies nin de la Conseyería d’Educación”. Sicasí, sí se tuvo conocencia del usu indebíu d’un arquivu con datos personales d’opositores al cuerpu d’enseñances secundaries pal procesu selectivu de xunu».

Por eso, indicó, la dirección xeneral d’Estratexa Dixital ta faciendo un analís técnicu de los datos mentaos pa ponelo en conocencia de l’Axencia Española de Protección de Datos, tal que marca la llei. La conseyería que dirixe Carmen Suárez añedió que, nel so casu, va abrir un espediente d’investigación internu pa depurar responsabilidaes. Si detéctense acciones constitutives de delitu, entós van ponese en conocencia de les autoridaes xudiciales. Tamién apuntó que comunicó lo asocedío a el presidentes de los tribunales, que son responsables de la so custodia.

El procesu selectivu dirixese a profesores de Secundaria y técnicos de Formación Profesional. En total, más de 500 places, pa les qu’hai almitíes más de 6.700 persones. Magar los pidimientos de dellos sindicatos por que se aplacen pola carga de trabayu» del profesoráu anguaño y la medrana a que les andaes vaigan a más, la conseyera, Carmen Suárez, sorrayó que «les oposiciones tán convocaes y tiénense que realizar». Tán previstes pa los díes 19 de xunu (exame teóricu) y 26 de xunu (prácticu).

Tamién te podria gustar