Educación abona’l presupuestu añal a los centros tres les quexes pol retrasu

Taben acostumaos a recibir el presupuestu ente los meses de marzu y abril, pero anguaño colexos ya institutos públicos vieron retrasase la cantidá asignada pola Conseyería d’Educación retrasóse y entá nun la recibieron.

Ayeri, el conseyeru d’Educación, Genaro Alonso, aseguraba que los abonos de 2017 «yá tán llegando a los centros ensin problema nengunu». Atribuyó la demoranza a l’aplicación d’un nuevu sistema, el Sigece (Sistema Integral de Xestión pa Centros Educativos), «muncho más claro y tresparente». «Estableciéronse criterios oxetivos y, dientro d’esta aplicación informática, los centros pueden verificalos», señaló.

Directores de Secundaria colos que s’axuntó Alonso ayeri esplicaron que faen referencia al númberu d’alumnos que tien el centru, d’aules, los años de construcción del edificiu qu’ocupen pa dar clase, si’l centru tien más d’un inmueble… Son polos que s’emponía hasta agora la conseyería p’asignar les cantidaes con cuenta de, a partir d’elles, los centros pudieren faer los presupuestos, pero agora «tán meyor estructurados», señalaron dellos directores a la salida.

Alonso apuntó que «esta demoranza ye coyuntural. Nun tien por qué volver asoceder n’ediciones futures» y apuntó que «nun hubo dificultaes insalvables» en colexos ya institutos, magar les quexes de «afuega» que llegaron al sindicatu ANPE por non recibir les cuantíes nel tiempu establecíu. El conseyeru aludió tamién a «otra de les ventayes» del sistema: «la posibilidá de que los centros puedan comunicase con conseyería al traviés d’él pa determinar les necesidaes d’infraestructures».

El conseyeru fixo estes declaraciones tres la entrega de premios ‘Consumópolis’ de la fase autonómica y qu’anguaño lleguen a la so decimosegunda edición. Los centros que se llevaron el primer premiu y que, por tanto, van representar a Asturies na nacional fueron el colexu Baudilio Pládanu, na categoría de quintu y sestu de Primaria; el IES Infiesto, na de primeru y segundu de Secundaria, y el IES Altu Nalón, na de terceru y cuartu de la ESO.