Ediciones Trabe edita ‘Cancioneru. Lírica d’ayeri y de güei’ de Vicente J. Sánchez

La editorial Trabe sacó al mercáu estes selmanes un nuevu llibru dedicáu a la música y tituláu ‘Cancioneru. Lírica d’ayeri y de güei’, del que ye autor el director de coru Vicente J. Sánchez García. Nel llibru apaecen 30 nuevos cantares basaos n’otros tantos poemes de toles dómines de la lliteratura asturiana que van dende dende Pin de Pría o Tiadoro Cuesta a Manuel Asur o Humberto Gonzali.

El llibru, diz l’autor, “busca siguir el camín de cancioneros clásicos como los de Martínez Torner, Víctor Sáenz o González del Valle y por eso quixi que la música tuviere lo más averao posible a la canción asturiana tradicional, con una melodía y un acompañamientu cenciellu pa la segunda voz”.

El llibru ufierta, amás, trés composiciones con una versión de coru pa cuatro voces mistes ya inclúi obres de, amás de los yá nomaos, Fernán Coronas, Enrique García-Rendueles, Xosé Manuel Valdés Costales, Lourdes Álvarez, Xuan Xosé Sánchez Vicente, Manuel Asur, Mª Elvira Castañón, Luis Aurelio y Pepe Campo ente otros. El ‘Cancioneru. Lírica asturiana d’ayeri y güei’ va presentase’l sábadu 15 de setiembre nos actos d’Arribada 2007, nel Antiguu Institutu de Xixón, a les once y media la mañana.