Dolce17 ufierta esti branu 137 actividaes d’ociu gratuites n’Uviéu

La conceyala d’Atención a les Persones d’Uviéu, Marisa Ponga, presentó esta esta selmana la ufierta braniza del programa d’ociu xuvenil alternativu Dolce17 qu’inclúi 137 actividaes culturales, lúdiques y deportives totalmente gratuites pa menores d’ente 12 y 17 años.

Ponga señaló como principal novedá al respective de años anteriores, qu’esta edición gana una selmana más d’actividaes, pasando de 9 a 10 selmanes y va desenvolvese ente’l próximu 27 de xunu y el 2 de setiembre. La conceyala sorrayó qu’esti programa tien un doble oxetivu: ufiertar a los mozos del conceyu alternatives d’ociu “que los alloñar de los consumos tóxicos” y facilitar la conciliación.

Nesti programa van collaborar 31 entidaes ensin ánimos d’arriquecimientu (asociaciones, clubes, federaciones, fundaciones) que programaron 88 actividaes ente que el euipo técnicu del Programa va dirixir otres 49 iniciatives nel denomináu espaciu abiertu. Dientro de les actividaes deportives, programaranse ente otres flag futbol, jugger, esgrima, kick-boxing ente que no que se refier al baille, habrá runfa fitness, breakdance, let´s dancie, etcétera.

Amás, y dientro de les actividaes culturales, van llevase a cabu talleres de graffiti con plantiya, fofuchas, diseña la to camiseta, manualidades reciclaes, encuadernación o cueru y nel apartáu de cocina; sabores d’Italia, galletes, pastelitos y cocina asturiana. Les actividaes van desenvolver de llunes a vienres n’horariu de 11 a 14:00 hores en La Corredoria del 27 de xunu al 29 de xunetu y el Centru Xuvenil Santullano del 1 d’agostu al 2 de setiembre.

No que fai a La Corredoria, los llunes y vienres va haber actividaes deportives, bailles y xuegos nel polideportivu de La Carisa; los miércoles desenvolveránse talleres culturales y de cocina nel centru social El Cortixu y los martes y xueves, les actividaes culturales van tener llugar nel Centru Xuvenil de La Corredoria. Pa participar nestes actividaes gratuites, los menores tienen de presentar autorización roblada y fotocopia del DNI. Pueden inscribise primeramente o’l mesmu día de l’actividá nel Centru Xuvenil Santullano o nel Centru Xuvenil La Corredoria.

Per otra parte, la conceyala ufiertó datos sobre ediciones anteriores d’esti programa y desplicó que nel añu 2014 desenvolviéronse 154 actividaes nes que participaron 3.258 moces (1.490 mozos y 1.768 moces). Hubo una mayor participación n’agostu, con 2.067 participantes qu’en xunetu, con 1.191. No que fai a 2015, programáronse 159 actividaes que cuntaron con 3.300 participantes, 1.899 moces y 1.406 mozos. Nesti casu la participación foi mayor en xunetu (1.740) que n’agostu (1.560).