Documental del mes en Xixón: Como yo quiera

Al traviés d’una narrativa fondamente personal, la directora Samaher Alqadi trai’l documental del mes en Xixón.

El movimientu feminista n’Exiptu ta coyendo más fuerza que nunca. Cada vez hai más muyeres que s’atreven a llevantar la voz contra l’acoso sexual. La Primavera Árabe traxo esperanza de llibertá y cambeos; sicasí, de cutiu escaezse que mientres la multitudinaria protesta del 25 de xineru de 2011 na plaza Tahrir d’El Cairo produciéronse selvaxes violaciones en grupu. La indignación de les muyeres exipcies desencadenó una gran protesta pa defender los sos derechos.

La directora Samaher Alqadi tuvo en primer llínea pa prindar una revuelta de les muyeres que pasó desapercibida a los medios de comunicación. Mientres el rodaxe, Alqadi quedóse embarazada y el filme cavilga sobre la maternidá y les llendes de la llibertá.

Al traviés d’una narrativa fondamente personal, Alqadi esplica les alcordances dolioses de la so infancia pa ilustrar les torgues a los cualos enfréntense munches moces nes sociedaes árabes. La valentía de Alqadi pa esquizar los raigaños de la desigualdá de xéneru n’Oriente Medio trespasa fronteres y llanza una puñada al patriarcáu cola cámara convertida nuna arma de autodefensa.

Dirección: Samaher Alqadi (Israel, 1976)
V.O. n’árabe ya inglés
Duración: 88 minutos

Accesu a la película (alcuérdate de solicitar primeramente’l códigu en promociondelasartesgijon.es)

Organizador: Departamentu d’Innovación Cultural
Cuando: Del 14 de setiembre de 2021 al 28 de setiembre de 2021