Dixebra recibe dos premios reclamando la oficialidá del asturianu

El grupu Dixebra, qu’anguaño cumple venticinco años d’actividá ininterumpida, recibía esta selmana dos gallardones por cuenta de la so llarga trayectoria. El primeru recoyíalu’l llunes pasáu en Piedrasblancas, capital del conceyu de Castrillón, onde la Banda de Gaites L’Alborecer facía entrega del so máximu gallardón a la formación decana del rock asturianu. La Gaita d’Oru recibíenla nel marcu del Día de Castrillón nes fiestes llocales, de manes de l’alcaldesa, Ángela Vallina, pola so xera en defensa de la llingua asturiana y la incorporación de la música asturiana a contestos sonoros contemporáneos.

El segundu reconocimientu llegó-yos en casa, asina na novena edición de los premios qu’añalmente concede’l periódicu La Voz de Avilés, foron merecedores del gallardón nel apartáu d’Acción Cultural. Na gala d’entrega, que se facía esti xueves, y a la qu’asistíen bien de representantes políticos del país, ente ellos tolos alcaldes d’Avilés y comarca, diputaos na Xunta Xeneral (como Ignacio Prendes d’UpyD o Jesús Gutiérrez del PSOE –amás de secretariu xeneral de la FSA-), senadores (como l’expresidente asturianu Álvarez Areces), conseyeros (Presidencia y Educación y Cultura) y otros cargos de l’alministración, Dixebra fizo alcordanza de tolos músicos que trabayen cola llingua asturiana como ferramienta de creación, pidió “dende la humildá, pero tamién dende la convicción nes nuestres razones, que los representantes políticos asuman con naturalidá, respetu y llibertá’l fechu llinguísticu asturianu”, desixeron que s’acabe col “apartheid llingüísticu que sufre esti país llamáu Asturies” y acabaron la so intervención comentando que’l “meyor premiu que nos pueden dar a la xente que trabayamos, nos comunicamos o creamos na llingua asturiana ye’l de la so oficialidá”.

Otra manera, Dixebra sigue cola so xira braniega, que los va llevar a tocar nes próximes selmanes en llugares como Candás, Carabanzo o Avilés, amás de delles cites fuera del país. A la vuelta del branu van enzarrase nel llocal d’ensayu pa preparar los temes que van formar parte del so discu nuevu, pal que baraxen la so salida a la cai nos primeros meses del añu qu’entra.