Dixebra presenta’l viernes n’Avilés “Tiempos Modernos”

La banda de rock avilesina Dixebra va presentar el próximo vienres 15 de noviembre a les 20:30 nel auditoriu de la Casa de la Cultura d’aquella ciudá so trabayu discográfico nuevu, que lleva por títulu “Tiempos Modernos”. Va facelo con un conciertu onde van dar a conocer la mayoría de temes que formen parte d’esta entrega nueva de la so música, que fai yá la númeru dolce dende la so nacencia nel año 1987. La presentación esta pensada como una actuación especial, cola colaboración de dalgunos de los músicos convidaos na grabación, casu de Toño Gómez (trombún), Javier Texedor (acordeón), Vito Álvarez (voz) o’l raperu asturcolombianu Shalóm; además d’ello los cantares van complementase con montaxes de video inspiraos nes lletres, fechos pa la ocasión pol realizador Guillermo Fernández.

El conciertu tendrá dos partes estremaes, una primer compuesta mayoritariamente polos temes nuevos incluyíos nesti discu, con introducciones onde van esplicase cómo surdieron y que los inspiraron, y una segunda onde van facer una repasada polos cantares más conocíos y queríos polos sos siguidores.

Tiempos Modernos presenta quince composiciones que musicalmente muevense ente’l punk-rock, el metal-rap, el ska- reggae y el folk-rock, con un amiestu d’estilos yá característicu nel grupu. La base sonora (batería, baxu y guitarres) rexístrosé al empar, cola cuenta de nun perder nada de la fuerza y espontaneidá que querían amosar los componentes de la banda, después d’ello fueron incluyíndose los demás preseos (guitarra acústica, ukelele, gaites –midi y tradicional-, violín, acordeón, metales, etc) y les voces. La resultancia final ye un discu con un soníu nada encorsetáu, contundente y con un puntu de naturalidá que lu alloña de cualquier artificiosidá. Temáticamente los cantares traten d’asuntos de actualidá, anque enllazando pasáu y presente, con referencies a la hestoria contemporánea d’Asturies, pero ensin escaecer otres cuestiones más xenerales o internacionales. El título del discu, sacante d’una frase d’ún de los cantares, fai referencia a la famosa película de Chaplin, colo que Dixebra quier reflexar qu’aquel tiempu que creíamos yá desterráu está más cerca que nunca.

La banda espera tar arropada nesta presentación con una bona cantidá de «dixebriegos», que pueden faese coles entraes a un preciu de 12 euros antemanada y 15 en taquilla.