Dixebra escosa les dos primeres ediciones del discu-llibru cola so hestoria, ‘Cróniques d’un pueblu’

La crónica musicada del rock asturianu vende. El sellu discográficu L’Aguañaz plantégase yá una tercer edición del llibru discu ‘Cróniques d’un pueblu’, que recupera en lletra y soníu la hestoria de la banda avilesina Dixebra, depués que s’escosaren les dos primeres tiraes del volume, integraes por un total de 2.000 exemplares. El veteranu grupu céntrase agora na preparación del so nuevu discu, que saldrá al mercáu na primavera.

Magar del so ésitu de ventes, la reedición de ‘Cróniques d’un pueblu’, obra’l periodista xixonés y collaborador d’Asturnews Francisco Álvarez, deberá esperar polo menos hasta la prósima Navidá, yá que L’Aguañaz ta acabante de llanzar sendes segundes tiraes -de 500 exemplares cada una- de los discos ‘Al xeitu de nenyuri’, de Tarañu, y ‘Sangre d’ochobre’, de Skanda, obres que vieron la lluz esti añu y que tamién escosaron les sos ediciones iniciales de mil exemplares.

Los integrantes de Dixebra enfótense agora nos trabayos de preparación del que va ser el so discu númberu ocho, trabayu que yá tienen perfiláu nuna premaqueta con hasta 30 idees de posibles temes, y pa ello opten por postergar les sos actuaciones en directu. “Nun se pue pensar ónde tocamos mañana y ensayar un canciu pa meyoralu y al mesmu tiempu tar preparando discu nuevu”, señala’l vocalista de la banda, Xune Elipe.

Poro, los integrantes del emblemáticu grupu de rock n’asturianu, que l’añu prósimu cellebra los sos 18 años d’esistencia, retomen agora l’actividá depués de quince díes de pausa colos güeyos puestos dafechu nel que quieren que seya un discu bien cocináu y acabáu, que va grabase nos estudios Tutu de Corvera baxo la supervisión del técnicu de soníu habitual de la banda, Sergio Rodríguez.

Amás d’ello, Dixebra estudia dalgún tipu de collaboración pal so inminente nuevu discu del productor vascu Kaki Arkarazo -en cuyu estudiu guipuzcoanu grabó Dixebra ‘Sube la marea’- que podría cincar al procesu final de mezcles.