Di Steffano, Pelé, Maradona , Cruyff y Beckenbauer opten xuntos al Príncipe d’Asturies de Deportes

Diversos medios lationamericanos informen na so edición d’ayer de la presentación d’una candidatura conxunta al Premiu Príncipe d’Asturies de Deportes entamada colos cinco meyores futbolistes de tolos tiempos. Los arxentinos Alfredo Di Steffano y Diego Armando Maradona, el brasileiru Edson Arantes do Nascimento ‘Pelé’, l’holandés Johan Cruyff y l’alemán Frank Beckenbauer, fueron propuestos a la Fundación Príncipe por dellos miembros de los sos xuraos, ente ellos el cineasta José Luis Garci. El premiu fállase el prósimu 6 de setiembre n’Uviéu.

Hasta agora namás trescendiera la candidatura del pilotu español Angel Nieto, propuesta pol Ayuntamientu de Madrid en reconocimientu a un de los motociclistes que más premios algamó a lo llargo de la so carrera deportiva. Nieto va tener de competir con una candidatura del pesu de los cinco astros del fútbol, cola que según los sos promotores, encabezaos por José Luis García, diba premiase la contribución que ficieron a la hestoria del deporte rei Di Steffano, Pelé, Maradona, Cruyff y Bechenbauer, consideraos unánimente los meyores xugadores d’esti deporte de tolos tiempos.

Hasta agora los xuraos del Premiu Príncipe d’Asturies de Deportes tuvieran cierta preferencia por figures del atletismu como Sebastian Coe, Hicham el Guerruj, Serguei Bubka, Carl Lewis, Hassiba Boulmerka y Javier Sotomayor. Tamién algamaran el galardón ciclistes como’l navarru Mikel Indurain o el norteamericanu Lance Amnstrong, o tenistes como Arancha Sánchez Vicario y Martina Navratilova. De cumplise los allampios de los promotores de la candidatura, diba ser la primer vez na qu’unos futbolistes fueren reconocíos col premiu de la Fundación asturiana.