Delles actividaes calienten motores per Asturies pa la celebración del festival Liet International

El Salón d’Actos de la Biblioteca de la Facultá de Filosofía y Lletres de la Universidá d’Uviéu recibió esta mañana una conferencia titulada “Les llingües minoritaries n’Europa. La música y la cultura como elementu recuperador”. Diferentes espertos llegaos de distintos países europeos aldericaron nuna ponencia qu’inauguró’l programa d’actos del Liet International 2012. Nel eventu participaron, xunto al director del Secretariáu de la Carta Europea pa les llingües rexonales y minoritaries del Conseyu d’Europa, Alexey Kozhemyakov que presentó la charra “La Carta Europea pa les Llingües Rexonales y Minoritaries 1992-2012. Venti años depués. Llogros y nuevos retos”; el director de Gaelic Arts & Cultura, Brian Ó hEadhra, con un analís sobre’l desarrollu del arte y la cultura gaélica n’Escocia.

“Normativización y normalización de la llingua asturiana” ye’l títulu de la intervención d’Ana Cano, presidenta de la Academia de la Llingua Asturiana y, tres d’ella, l’escritor y investigador del Friul Marco Stolfo, autor del llibru “Rock music in minority languages”, va falar sobre “Llingües que roncaroleen y músiques fuertes na Europa “unida na diversidá”. De siguío, el coordinador del Liet International Onno Falkena va esponer los diez años d’esti festival, pa dar pasu a la directora xeneral de Política Llingüística, Ana María Fueyo Llaneza que va desarrollar una esposición sobre “Evolución de la música n’asturianu nes últimes décades. Apoyu institucional y Liet International 2012”. Finalmente, el músicu Brian Ó hEadhra va ciarrar l’actu con una actuación musical.

Con esti actu na Facultá de Filosofía y Lletres da empiezu’l programa d’actividaes del Liet International Asturies 2012 que, a les 20.30 h., va siguir nel Valey Centru Cultural de Castrillón con un conciertu de los grupos Yldau, Lleuwen y Brian Ó hEadhra, finalistes del festival.

El programa que xira alrodiu a la celebración del Festival Liet International nel Teatru de Llaboral Ciudá de la Cultura, el sábadu día 1 a les 21.15 h, complétase cola presentación nel Paraninfu, a les 12.30, del documental “Linghe in Musica”, a cargu del so director, Marco d’Agostini. La celebración de la Copa Cantábrica de Liriu y una Conferencia-taller sobre’l proyectu HIAHOKA son otres de les actividaes que van tener llugar el sábadu nel recintu de Llaboral.

Liet International ye un concursu de canciones en llingues minoritaries que nació nel añu 2002 en Frisia (Baíses Baxos). Depués de les ediciones celebraes en Frisia, na zona del territoriu sami asentada en Suecia, Bretaña y Friul, Asturies va ser la sé del Liet International nesti añu 2012, y Xixón la primer ciudá de la Península Ibérica que lu acueye. Por ser ún de los eventos más importantes pa la promoción de les llingües europees minoritaries y la música interpretada nun idioma rexonal, fue reconocíu pol Conseyu d’Europa, que lu patrocina dende 2008. La Conseyería d’Educación, Cultura y Deporte del Principáu d’Asturies organiza un programa d’actividaes que se van celebrar concidiendo col certame.

L’actu central va ser el Festival Liet International, nel qu’once formaciones -que representen a los idiomes gaélicu escocés, euskera, udmurtiu, bretón, baxu saxón, sami, frisiu, corsu, friulanu, catalán y asturianu- van concursar nuna final que se va celebrar el 1 d’avientu en Llaboral Ciudá de la Cultura, en Xixón (Asturies), nuna gala que va cuntar tamién cola actuación del grupu asturianu Dixebra nel tiempu que duren les votaciones del públicu y les deliberaciones del xuráu. El festival, que va empezar a les 21.15 hores, va ser retresmitíu en directu per televisión y Internet al traviés de la Televisión del Principáu d’Asturies (TPA). La entra ye llibre hasta completar aforu.