‘De sidra y sidrerias por Xixón’, nueva guía de Serxu Solares

Esti martes día 2 d’ochobre a les siete la tarde, el Llagar del Restaurante Bellavista de Xixón va acoyer la presentación del llibru ‘De Sidra y Sidrerias por Xixón’. Nel actu van intervenir l’autor del mesmu, Serxu Solares; l’editor Lorenzo Pañeda; y el xerente de la Sociedá Mista de Turismu de Xixón, Joaquín Miranda.

Tres del esitu del llibru ‘De vinos y tapas por Asturies 2006’, del que ta prevista una edición 2007 que llegue a repitir les ventes de l’anterior (más de 1500 exemplares en dos ediciones), Serxu Solares espubliza agora ‘De Sidra y Sidrerías por Xixón’. La publicación, fecha a toa color, con ciento cincuenta páxines y más de cincuenta semeyes, fai un repasu de la cultura sidrera y del vocabulariu propiu a la mesma, ufierta dalgunes recetes creatives y al tiempu presenta una crítica de dalgunos establecimientos sidreros de la villa xixonesa.