Dani García de la Cuesta presenta ‘Tócame algo’ na televisión llocal de Xixón

Dende va menos d’un mes ta emitiendose na televisión llocal de Xixón un nuevu espaciu dirixíu pol músicu Daniel García de la Cuesta. El programa entamó a emitise’l llunes 22 d’ochobre y ta dientro del programa d’Arancha Fernández, Toma Nota, que s’emite de llunes a vienres ente les 18,30 y les 20 hores. L’espaciu ‘Tócame algo’ ocupa los llunes de 19’30 a 20 hores.

El conteníu del programa xira alredor de la hestoria y l’usu de los instrumentos musicales utilizaos na tradición asturiana. Pa ello, García de la Cuesta cuenta en directu cuestiones sobre la etimoloxía de los instrumentos, amás d’apurrir dalgunes imáxenes del so usu tradicional n’Asturies y otres qu’ilustren detalles de la so construcción. Amás, va poder sentise’l soníu d’estos instrumentos.

Dani García de la Cuesta ye profesor de la escuela de música tradicional La Quintana, forma parte de grupos folk como Lliberdón y Merlín y fai trabayos d’investigación sobre diferentes instrumentos musicales. Destaquen, ente los llibros que tien espublizaos, ‘La bandurria y el rabel’ y ‘Historia del harpa y la so presencia n’Asturies’.