Damián Barreiro gana’l premiu “Fierro Botas” 2013

“L’espeyu onde miranos: televisiones de proximidá n’europa Occidental y procesos de recuperación identitaria”, ye la obra ganadora del sestu premiu Fierro Botas, que concede l’Ayuntamientu de Xixón al traviés de la Conceyalía d’Educación, Cultura, Mocedá y Fiestes. Ye esti un completu ensayu sobre l’importante papel que los medios de comunicación tienen na pervivencia d’un idioma.

El premiu dotáu con 3.000 € y la publicación del ensayu, foi pa la obra del periodista Damián Barreiro Maceiras (A Estrada 1984), magar qu’avilesín de tola vida, exredautor del diariu dixital Asturies.com y del periódicu Les Noticies, anguaño collaborador en Diagonal Asturies y la seición infantil n’asturianu de LNE, Escolinos.

El xuráu, qu’aconceyó’l pasáu miércoles 27 de payares, taba formáu por D. Carlos Rubiera Tuya, Conceyal d’Educación y Cultura y Presidente del xuráu; D. Humberto Gonzali García, escritor y xestor cultural; D. Jose Ramón Iglesias Cueva, profesor y representante de l’Academia de la Llingua Asturiana; D. Jaime González Fierro-Botas, filólogu y representante de la familia Fierro Botas; D. Inaciu Hevia Llavona, ganador de la edición anterior del Premiu Fierro Botas y Dña. Mª Xosé Rodríguez López, Responsable de la Oficina de Normalización Llingüística, que fizo de secretaria.

El premiu, concedíu por unanimidá, quixo premiar lo interesante del tema, de gran actualidá anguaño y la novedá que representa no que tien de ver col so conteníu, rescamplando sobremanera l’análisis que l’autor fai de les televisiones de proximidá mesmo n’Europa como nel estáu español y la so visión personal y nacional d’Asturies como país con identidá propia, los xéneros televisivos y l’idioma como xerme d’una industria cultural.