Cultura va encargase de remocicar horros y paneres de forma directa

El Conseyeru de Cultura y Deporte anunció estos díes una fonda revisión de la política de caltenimientu de los horros y paneres qu’hai n’Asturies. De magar esti momentu la so Conseyería va encargase directamente de restaurar y reparar horros del sieglu XVI y paneres del sieglu XVII d’especial relevancia histórica, artística y patrimonial, acabando con un política de sovenciones que dexaba en manes de los propietarios la conservación o non d’un patrimoniu fráxil y d’importantísimu valor.

El Conseyeru recordó que “l’anterior Alministración nun apurrió nin un solu euru de los presupuestos autonómicos al arreglu d’horros en 2011” y abogó por una “seria reflexón sobre la política de sovenciones a particulares que se vieno desenvolviendo nes últimes trés décades” yá que recordó que “Llamentablemente, la política de sovenciones nun detuvo la desapaición d’horros y paneres d’enforma interés, de construcciones de los sieglos XVI y XVII, delles profusamente decoraes; nós podemos restaurar los elementos más destacaos, pero precisamos tamién un compromisu de los propietarios por qu’autoricen el desenvolvimientu de los llabores de caltenimientu”.

La Conseyería va empezar a aplicar esta política en 2012 nuna serie d’horros del conceyu de Quirós: “Vamos Ser selectivos porque caltener ye escoyer”. Les restauraciones van tar venceyaes al ámbitu d’actuación del Muséu Etnográficu de Quirós, encargáu de la divulgación y espardimientu d’estes construcciones.

La Dirección Xeneral de Patrimoniu Cultural prepara, coles mesmes, un estudiu de los primeros horros y paneres que se caltienen na rexón pa integralo nuna base de datos del inventariu únicu del patrimoniu cultural asturianu. Tamién va promover un mayor espardimientu de los horros y paneres que se caltienen n’Asturies “porque”, según sorrayó Marcos Vallaure, “una gran mayoría d’asturianos desconoz la so esistencia y la so importancia pal nuesu patrimoniu cultural; anque paeza mentira, equí nun esiste nin un solu folletu turísticu alrodiu de los horros asturianos”.