Cultura entama’l ciclu de cine “Muyer tres les Cámares”

Nel marcu del proyectu européu Wom@rts, la conceyalía de Cultura d’Avilés -de la mano de la Factoría Cultural y la Fundación Municipal de Cultura-, entama’l ciclu cinematográficu “Muyeres tres la cámara”, cola proyección de cinco películes y documentales empobinaos por realizadores de prestíu internacional. La primera, ‘L’ìle de Chelo’, va tener llugar el 8 de marzu, Día Internacional de la Muyer.

Toles sesiones van ser telemátiques y podrán siguise al traviés de la canal de Youtube de la Factoría Cultural a partir de les 20 hores, ya inclúin un coloquiu previu nel que distintes muyeres van intercambiar esperiencies ya idees sobro los filmes, el so contestu históricu y les sos connotaciones presentes.

Nel casu de la sesión inaugural, van intervenir Yolanda Alonso, conceyala de Cultura; la música y compositor Beatriz Mayu Mangue, y l’abogada Almaluna Ubero Paniagua, máster en Protección Xurídica de Persones y Grupos vulnerables, venceyada con movimientos sociales y organizaciones polítiques y sindicales.

La primera de les proyecciones va ser “L’île de Chelo”, un documental de 2008 sobro la figura de Chelo, combatiente antifranquista, y la so llucha por asitiar un cercu funerariu sobro la fuesa común na que xaz Arcadio, el so compañeru y guerrilleru cayíu nuna emboscada de les tropes fascistes en 1946.

El documental, de 57 minutos, ye una obra colectiva, de los cineastes Laetitia Puertes, Ismael Cobo y Odette Martínez-Maler. Esta postrera, guionista, fía tamién d’un guerrilleru antifranquista exiliado en Francia, dio un xiru a la so vida cola so realización, na que da ecu a la voz de aquel lluchadores pola llibertá, como’l so padre.

La mesma Odette confiesa que lo que más-y dolió al so padre “foi siguir na clandestinidá y siguir consideráu nel so propiu país como un bandoleru o asesín, en llugar d’un guerrilleru antifranquista que quixo lluchar polos valor que defendía la República, d’emancipación de la muyer, llibertá, igualdá y escuela pa toos”.

El Centre Audiovisuel Simone de Beauvoir, en París, participante nel proyectu Womrts, pon a disposición de la Factoría Cultural el material cinematográficu que podrá vese hasta mayu dientro del ciclu. Esta entidá nació cola cuenta de caltener testimonios audiovisuales tocantes a la hestoria de les muyeres, los sos derechos, lluches y creaciones.