Cultura asoleya un discu con poemes de Mánfer de la Llera musicaos

La Conseyería de Cultura del Gobiernu d’Asturies asoleyó, coincidiendo cola Selmana de les Lletres Asturianes, un discu tituláu “13 X Mánfer”, que tien como oxetivu recuperar parte de la obra poética del escritor llangreanu Manuel d’Andrés Fernández, “Mánfer de la Llera”. La discográfica Ámbitu-L’Aguañaz preparó esta edición na que participen trece grupos y artistes adaptando poemes del autor de Ciañu.

El trabayu ábrese con una sesión d’electrofolk a cargu de Sergio Rodríguez, onde pue sentise la voz del propiu Mánfer recitar el poema «Nueche d’insomniu»; sigue la voz d’Anabel Santiago faciendo una tonada del testu «Cuando»; ensin dexar la canción asturiana, anque nesti casu más llixera, los Hermanos Valle Roso, col acompañamientu del pianu, dialoguen vocalmente con «Silenciu».

Apaecen tmamién Xabel, del que se recupera’l tema «L’Asturies eterna» (aparecíu hai años nel so únicu discu, onde precisamente ponía música a dellos testos de Mánfer); Toli Morilla, del que tamién se rescata una pieza grabada enantes, «Nueche d’insomniu» (tema central del espectáculu del mesmu nome); Alfredo González, que pon el so estilu particular al serviciu de «Tracamundiu»; y Xel Pereda (miembru de Llan de Cubel y guitarrista de la banda qu’acompaña a Nacho Vegas), que firma una pieza titulada «Soledá».

Una formación hestórica que perteneció al movimientu del Nuevu Canciu Astur, Renacencia, que vuelven a xuntase pa grabar en clave de pop-rock sesenteru «Les hores muertes», incluyendo la voz del fíu de Mánfer, Efrén d’Andrés y la guitarra del so ñetu Oscar. Pela so parte les pandereteres d’Herbamora y el grupu d’intérpretes que les acompaña convierten nun ramu tradicional la poesía «Atetuyu ante la muerte».

La grabación sigue pelos soníos folk con Felpeyu y la so adaptación de «La carbonera». L’electrofolk vuelve con Xera y el poema «Yo quixera». «13 x Mánfer» piésllase con Dark la eMe y la so adaptación hiphopera d’«Asturies, patria querida», la primer grabación del raperu n’asturianu y Dixebra, que fai rock del poema «Contrastes».

El discu presentóse nel Teatru Nuevu de La Felguera, dientro de los actos de la 32 Selmana de les Lletres Asturianes.