Cuadruplíquense les denuncies por amenaces y agresiones a profesores

Los colexos españoles viven una esguilada d’amenaces y agresiones de los alumnos a los sos profesores, sigún dellos informes sindicales que se dieren a conocer esta selmana por parte del sindicatu ANPE.

Esti del xorrecimientu d’amenaces y agresiones ye l’enclín que, de forma significativa y esmolecedora, amuesa l’informe añal del Defensor del Profesor, un serviciu d’asistencia a los docentes víctimes de situaciones de conflictividá y violencia qu’ufierta’l sindicatu ANPE, según esplicó’l so presidente, Nicolás Fernández.

L’estudiu, basáu nos casos que los docentes denuncien al serviciu, revela que’l cursu pasáu cuadruplicáronse les consultes por amenaces y ataques verbales y físicos de los alumnos. De 59 saltose a 270 (una crecedera del 357%), lo que significa que se pasó del 3% de les llamaes rexistraes en 2015 al 12% de 2016.

Non se trata namái d’un saltu alarmante, esplicó Fernández, sinón que ruempe unu enclín positivu de trés años de descensu siguíu de les agresiones. La prueba de que ye un datu significativu ye que dobla’l volume de denuncies d’esti tipu del cursu qu’hasta agora tenía’l peor datu del últimu llustru, 2013-14, cuando supunxeron el 6% de les llamaes del serviciu.

La esguilada de casos d’amenaces y agresiones a docentes nel cursu 2016-17 ye tan relevante que llastra les cifres xenerales de conflictividá escolar rexistraes pol Defensor del Profesor. Tres trés años d’evolución positiva, el cursu pasáu les denuncies nel serviciu (2.249) crecieron un 15%, con un aumentu de 290 casos, ente los que tuvieron un papel clave los 211 ataques d’escolares más. L’únicu datu positivu ye que les agresiones de padres a maestros siguen enllancaes, per tercer añu consecutivu, nun baxu 3% de les denuncies.

Los dirixentes d’ANPE almitieron que nun tienen xuna esplicación concreta pal gran aumentu d’ataques, pero apuntaron como causa principal a los retayos del gastu educativu, qu’alzaron les ratios por aula y amenorgaron al mínimu los programes de refuerzu y d’atención a la diversidá y a la repetición.