Cristina Muñiz presenta ‘El buscador d’hestories’ nel Salón del Llibru Asturianu de Xixón

El V Salón del Llibru Asturianu de Xixón sigue abiertu estos díes na carpa de la cai Tomás y Valiente, xunto a la Plaza’l Parchís y con presentaciones de llibros y talleres pa los neños. Dientro d’eses actividaes va presentase güei’l llibru de rellatos ‘El buscador d’hestories’, una obra de Cristina Muñiz Martín.

Con El buscador d’hestories, Cristina Muñiz Martín sigue y perfecciona’l camín qu’entamara en 2005 col volume de cuentos Onde pisen poques güelles, publicáu tamién por Ediciones Trabe y col que fue quien a sorprender y agradar tanto a la crítica como al públicu llector. Banciando ente lo real y lo máxico, l’autora d’estos 19 cuentos fai un rellatu cuando desapasionáu y distante, cuando enllén de sutil ironía, de la sociedá d’anguaño, formada por seres humanos capaces de lo peor, pero que son tamién quien a sacar lo meyor qu’hai na so naturaleza.

Cristina Muñiz Martín espublizó nel añu 2005, el llibru de rellatos ‘Onde pisen poques güelles’. Esti añu apaeció nel llibru de monólogos ‘Ente muyeres’, una amuesa de lo que da de sí la creación de monólogos per parte de les muyeres. Anguaño prepara la so primer novela y fai guiones pal programa ‘Nomes d’Asturies’ dirixíu por Chechu García y emitíu na RPA y pa ‘La risión’, sección de monólogos del programa de la TPA ‘Al Aldu’.