Convócase la edición sesta del Concursu de Rellatos Mineros “Manuel Nevado Madrid”

La Fundación Juan Muñiz Zapico ta acabante convocar la sesta edición del so concursu de rellatu curtiu de temática minera. Al concursu pueden presentase escritores de cualquier nacionalidá, siempre y cuando que les obres presentaes tean escrites en castellán o n’asturianu, seyan orixinales y ensin asoleyar.

Cada autor pue presentar un máximu de dos microrrellatos por cada autor o autora, falando necesariamente a dalgún aspeutu (motivos temáticos, personaxes, argumentu o ambientación) venceyáu col mundu de la minería de cualesquier país.

La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares.

Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu.

El plazu d’entrega d’orixinales acaba’l día 22 d’ochobre de 2009. Y el concursu ta dotáu con 1000 € pal primer Premiu 1.000 € más un llote de llibros y un grabáu de Manuel Calvo por un valor total de 350 €. Amás, pa rellatos n’asturianu, el premiu va ser de 600 € (300 € en metálicu, más un grabáu de Manuel Calvo y un llote de llibros por valor de 300 €).

La Fundación premia amás, el Testimoniu Históricu con 300 € (150 € en metálicu más un llote de llibros por valor de 150 €), para obres que falen de fechos reales (biográficos, sindicales o sociopolíticos); siempre en rellación con conteníos históricos o acontecimientos socedíos nel entornu familiar o llaboral mineru; y un accésit mocedá, pa menores de 26 años, dotáu 300 € (150 € en metálicu más un llote de llibros por valor de 150 €).

Los rellatos premiaos, y una escoyeta fecha ente los rellatos presentaos asoleyaránse pola Fundación Juan Muñiz Zapico.