Conderguen al Gobiernu asturianu a indemnizar con 9.900 euros a una profesora afrellada por un alumnu

La Conseyería d’Educación del Principáu d’Asturies foi condergada a indemnizar con 9.900 euros a una profesora que sufrió una agresión per parte d’un alumnu, que la obligó a permanecer 50 díes ensin trabayar.

Carmen Canga, la docente, asegura que nun-y interesa’l dineru sinón que l’alministración dea cuenta de qu’hai un problema nes aules qu’hai qu’atayar con más medios. L’autor de l’agresión, un neñu de 10 años, yá protagonizara otros fregaos y agresiones a esta y otru profesores.

L’agresión produciose’l 16 de mayu de 2013 nuna clase de cuartu de primaria d’un colexu d’Uviéu. L’alumnu, que nun quería entrar en clase, balancióse sobre ella retorciéndo-y el pulgar de la manzorga hasta saca-y el tendón. La profesora tuvo que ser intervenida dos veces y pasó 50 díes de baxa. Foi’l mesmu centru sanitariu’l qu’interpunxo la denuncia.

Asegura que nun yera la primer vegada que daqué asina asocedía con esti alumnu. Hubo agresiones previes y otru profesores a les que solmenara pataes nel estómagu y puñaes. Ello ye que foi espulsáu delles vegaes.

Nesta sentencia, que sienta xurisprudencia, el xuez entiende que’l funcionamientu de l’alministración educativa nun fuera’l fayadizu. L’asuntu llegó al xulgáu cuando’l sindicatu CSIF decidió recurrir el resolvimientu del Conseyu Consultivu qu’emitiera un dictame nel que eximía de responsabilidá patrimonial a l’Alministración.

La sentencia reconoz agora que l’Alministración “tenía plena conocencia de la difícil situación que plantegaba la conducta del alumnu” y que nun s’emprestó “atención específica” a esta problemática.